امریکی قانون سازوں کی کشمیر کے حوالے سے بھارت پر شدید تنقید
بھارتی اقدامات کی وجہ سے مسلم برادریوں کے حقوق پامال ہورہے ہیں،ہندوستان کی مذہبی اقلیتوں کو محکوم یا غیر ملکی سمجھاجاتاہے، دو طرفہ کمیشن ٹام لانٹوس ہیومن رائٹس کمیشن
کشمیر میں ہندوستانی حکومت کے اقدامات سے سخت پریشان ہیں، بھارتی نژاد امریکی کانگریس کی خاتون پرمیلا جیاپال
واشنگٹن (صباح نیوز)کشمیر کے حوالے سے امریکی قانون سازوں نے بھارت پر شدید تنقید کرتے ہوئے کہاہے کہ بھارتی اقدامات کی وجہ سے مسلم برادریوں کے حقوق پامال ہورہے ہیں،ہندوستان کی مذہبی اقلیتوں کو محکوم یا غیر ملکی سمجھاجاتاہے۔ امریکہ کے قانون سازوں نے ایک بار پھر جموں و کشمیر کی صورتحال پر تشویش کا اظہار کیا۔ شرکا نے اس خطے کی صورتحال کا جائزہ لیا اور 22 اکتوبر کو ہونے والی آخری سماعت کی طرح کانگریس کے ذریعہ کارروائی کی سفارش کی۔کمیشن کی طرف سے جاری ایک بیان میں کہا گیا ہے کہ دو طرفہ کمیشن ٹام لانٹوس ہیومن رائٹس کمیشن نے ہندوستان میں سابق ریاست جموں و کشمیر میں انسانی حقوق کی صورتحال کو تاریخی اور قومی تناظر میں جانچنے کے لئے سماعت کی۔ہندوستان نے 5 اگست کو جموں و کشمیر کی خصوصی حیثیت کو آئین کے آرٹیکل 370 کے تحت منسوخ کیا تھا ، جس سے جموں و کشمیر کے وسطی علاقوں اور لداخ کی تشکیل کی راہ ہموار ہوگئی تھی۔سماعت کے موقع پر بھارتی نژاد امریکی کانگریس کی خاتون پرمیلا جیاپال نے کہا کہ وہ کشمیر میں ہندوستانی حکومت کے اقدامات سے سخت پریشان ہیں۔ ڈیموکریٹ نے کہا ،لوگوں کو بغیر کسی الزام کے نظربند کرنا ، مواصلات کو محدود کرنا اور کسی تیسرے فریق کو کشمیر آنے سے روکنا ہمارے تعلقات کے لئے نقصان دہ ہے۔ان کے ساتھ دیگر ڈیموکریٹس شیلا جیکسن لی ، ڈیوڈ ٹرون اور ڈیوڈ سیسلین بھی شامل تھے ، جنہوں نے جموں وکشمیر کی خصوصی آئینی حیثیت کو ختم کرنے کے بعد ہندوستان کے اقدامات پر تنقید کی۔بین الاقوامی مذہبی آزادی پر امریکی کمیشن کی کمشنر ارونیما بھارگوا نے کہا کہ ان بھارتی اقدامات کی وجہ سے مسلم برادریوں کے حقوق پامال کیے جارہے ہیں۔انہوں نے سماعت کو بتایاکہ پورے ملک میں ، سیاسی اور برادری کے رہنما ایک نظریہ پیش کررہے ہیں جس سے یہ معلوم ہوتا ہے کہ ہندوستانی ہونا لازمی طور پر ہندو ہونا ہے ، اور ہندوستان کی مذہبی اقلیتوں کو محکوم یا غیر ملکی سمجھاجاتاہے۔انہوں نے کہا کہ ہندوستان کی مذہبی اقلیتیں فی الحال ایک سنگین صورتحال سے دوچار ہیں ۔ اگر ہندوستانی حکومت اپنے موجودہ راستے پر چلتی رہی تو ان کے معاشی حقوق اور آزادیاں سنگین خطرہ میں پڑسکتی ہیں۔جموں و کشمیر کے بارے میں ، بھگوا نے کہا کہ یو ایس سی آئی آر ایف (یونائیٹڈ اسٹیٹ کمیشن برائے بین الاقوامی مذہبی آزادی)کواگست سے ان خبروں پر تشویش لاحق ہے کہ ہندوستانی حکومت نے جموں و کشمیر میں نقل و حرکت پر پابندی عائد کردی ہے ، لوگوں کونماز اور مذہبی اجتماعات میں شرکت سے منع کیا جارہاہے۔یو ایس سی آئی آر ایف کومساجد بند ہونے کی اطلاعات ملی ہیں۔ ائمہ اور مسلم برادری کے رہنماوں کو گرفتار اور حراست میں لیا گیا۔
#/S